Müasir Sənət Mərkəzinin memarlıq konsepsiyası Azərbaycan mədəni irsinin və çağdaş sənət tərzlərinin sintezindən ilhamlanaraq formalaşdırılmışdır. Binanın ümumi formasında 8 guşəli ulduz kompozisiyası əsas götürülmüş, bu forma həm tarixi-mədəni simvollarımıza istinad edir, həm də rəmzi olaraq sənətin müxtəlif sahələrinin bir mərkəzdə birləşməsini ifadə edir. Fasadda istifadə olunan materiallarda tekstur kontrastları və güclü həndəsi qırılmalar, işıq və kölgə oyunları vasitəsilə dinamik və çağdaş təsir yaradır. Həmçinin, binanın ön hissəsində yerləşdirilən heykəltəraşlıq elementi və perforasiya edilmiş müasir detal kompozisiyaları layihənin həm estetik, həm də simvolik gücünü artırır.
Mərkəzin daxilində sənətkarların yaradıcılığı və müasir incəsənətin inkişafı üçün tam funksional mühit yaradılmışdır. Burada sərgi zalları, emalatxanalar, rəqəmsal studiyalar və interaktiv sənət platformaları nəzərdə tutulmuş, yaradıcılığın müxtəlif sahələri üçün uyğun məkanlar planlaşdırılmışdır. Təbii işıqdan maksimum faydalanmaq üçün geniş şüşə fasadlar və açıq məkan keçidləri istifadə olunmuşdur. Ziyarətçilərin və iştirakçıların rahatlığı üçün isə giriş zonası, istirahət guşələri və yaşıl sahələrlə əlaqəli sirkulyasiya planı layihənin sosial yönümlü funksiyalarını dəstəkləyir.
